05/05/2010

播放本新聞相關短片

政情:黃鴻超身陷紐約恐襲險境

政府要向外國推廣本港新高中學制,教育局常任秘書長黃鴻超呢幾日去咗美國東岸嘅紐約、華盛頓,今日就趕去西岸三藩市推銷新課程,作為訪美之行嘅終站。

佢喺個多星期走訪咗美國多間著名大學,期間仲抽時間同喺當地讀書嘅香港學生會面,趁機向佢哋介紹吸引海外學生在港升學嘅措施。雖然行程緊密,但當地人喺星期六、日唔開工,所以佢可以藉此空檔喺市內遊覽,點知上周六途經紐約時代廣場,發現周圍泊滿警車,氣氛相當緊張,佢起初都不以為意,點知返到酒店開電視睇新聞先知大件事。

相信大家仲記得上周六時代廣場發生汽車炸彈恐襲驚魂,如果成事,將係自九三年世貿中心造成六人死亡嘅小型貨車爆炸後,紐約最嚴重嘅汽車炸彈襲擊,可以話黃鴻超幾乎同呢場襲擊擦身而過。佢話離開現場冇耐,警方就已經全面封鎖時代廣場,好彩只係虛驚一場。