依家補選氣氛一池死水，公社兩黨歸咎於政府補選宣傳片冇呼籲市民投票，又怪政制及內地事務局向建制派屈服，允許現任議員唔使拆街板，令候選人宣傳街板難以突出。「五區公投」總發言人余若薇早前仲話各電子傳媒唔搞選舉論壇，令候選人冇平台宣傳添。

公文袋大狀亦甩底

佢係咁講啫，查實選舉氣氛低落同候選人放軟手腳不無關係。選舉事務處尋日向立法會政制事務委員會提交文件指出，二十四個候選人中，只有十一人喺郵政署指定寄出選舉郵件截郵日期，即四月三十日前寄出宣傳單張，計埋大專2012五名候選人因為選舉郵件唔合規格畀選舉事務處拒絕代寄單張外，仲有八個候選人放棄免費宣傳機會。免費都唔用，眾人放軟手腳參選嘅做法認真世間少見。

再講，民間電台喺呢個星期會一連五日舉行選舉論壇，過去兩日分別邀請港島區同九龍東候選人出席選舉論壇，公文袋兩名大狀早就話有事做唔會出席，但原本應承出席嘅港島區大專2012候選人梁永浩亦「甩底」，原因係佢要準備考試，抽唔到時間喎，最終只有李振雄一人講足全場；而昨日九龍東嘅論壇，亦只有大專2012嘅黎敬輝出席，試問咁又點可能有選舉氣氛呢？

呢個簡直係騎呢補選，難怪市民唔感興趣喇，仲當係鬧劇嚟睇添！不過，遲啲仲有啲選舉論壇嘅，睇怕港島區嘅候選人陳淑莊、梁永浩、戴卓賢、李振雄同黃興，九東嘅梁家傑同黎敬輝，應該有機會正面交鋒啩。