滙豐銀行櫃員機被匪徒安裝讀卡器，並成功盜取客戶二十幾萬蚊存款後，好多市民提款時都心驚驚，擔心自己成為下一個中招嘅人，滙豐雖然宣布咗補救方法，但該行亞太區行政總裁王冬勝講起呢個問題仍然好無奈，佢透露自己有個保安方法，就係㩒機時貼實部機，幾乎遮晒櫃員機，就可以避免被人盜取密碼，但好似佢咁攬實部櫃員機，可能都會引嚟誤會噃！
王冬勝前日參加一個慈善高爾夫球賽大顯身手，講起裝讀卡器盜密碼件事，佢好無奈咁話，呢個世界真係「道高一尺，魔高一丈」，最重要嘅係客戶唔好有損失，銀行亦會全數賠償畀受影響客戶。不過，佢都呼籲市民使用提款機時提高警覺。
身為銀行大班，佢都有時會親身去櫃員機提款，仲親身試驗咗一款防盜方法，原來佢㩒機時，會將身體挨到好埋，幾乎遮晒部櫃員機，其他人就睇唔到密碼喇，不過，唔係個個銀行客戶都好似王冬勝咁高大o架嘛。