立法會飲食界代表張宇人拋出時薪廿蚊嘅建議後，掀起全城怒潮，更成為尋日「五．一」勞動節遊行嘅人肉箭靶。不過，根據富貴黨嘅消息顯示，今次事件雖然對佢哋進軍直選之路有一定影響，但喺業界嘅選票卻冇乜大損失，甚至有賺添，因為唔少飲食界好多人都表示撐硬廿蚊張。
據了解，業界對廿蚊張並冇一般市民咁反感，譬如畀開廿蚊一個鐘伙記人工嘅茶餐廳老闆話明撐佢，連其他畀開廿四、廿五蚊嘅食肆連鎖店老細，都私下同佢講多謝，仲話以前班伙記收呢份糧冇乜特別感覺，聽完「廿蚊論」之後，就當堂覺得自己已算唔錯，人心安定。所以呢班老闆都暗撐廿蚊張，只係礙於群情洶湧，無人夠膽企出嚟明撐。
呢啲計在心中嘅票有幾多？二○一二年換屆選舉時一定會揭盅。不過，廿蚊張畀人鬧咗成個月，都好難笑得出，了解情況嘅人都知佢心情低落咗一排。呢鋪贏咗選票、輸咗心情、人氣，到底值唔值真係佢至知囉。