立法會上個星期三罕有咁通過咗加強買賣住宅物業銷售嘅動議，港台想請番當日辯論激烈嘅官員、議員出席論壇，可惜論壇嘅工作人員話問咗運輸及房屋局，想請局長鄭汝樺、甚至其他官員出席，但係至今都冇官員應戰。

代表地產界嘅議員石禮謙就擺明車馬話唔得閒，身為屋委員及市建局委員嘅工聯會議員黃國健就話自己抱恙同有家事在身，唔方便現身。

比較直接嘅係富貴黨副主席方剛，佢以擔心場面混亂為由拒絕；曾經話「九招十二式」冇用嘅恒地主席陳啟宗就連覆都唔覆，結果今日嘅論壇只得泛民議員同個別民間團體代表出席。