本文重點
廠商會立法會議員林大輝百足咁多爪，政經兩忙之外，又係球場同馬場嘅常客，尋日佢趁周末兼假期入馬場，但話明唔係捧愛駒，而係撐老友場，點知，最終佢匹「極奇妙」爆冷勝出，大輝嘴都合唔埋咁拉頭馬。不過一個鐘頭後，本地甲組足球聯賽傳來流浪與和富大埔打成平手嘅消息，間接宣布現時排喺榜尾、大輝艱苦經營嘅沙田足球隊提早降班，唔通真係馬場得意，球場就失意？
拉頭馬贏170萬元
尋日大輝兩點鐘就現身沙田馬場，要捧第四場嗰隻「多奇妙」場，匹馬嘅馬主係佢多年老友，七十年代，佢讀緊中二時已經做暑期工，仲結識咗當時嘅一個老闆劉志傑，兩人一段友誼維持多年，劉志傑做馬主後特登搵大輝幫佢隻馬改名，所以匹馬嘅名同大輝嘅愛駒「極奇妙」差唔多。
可惜「多奇妙」三甲不入，反而第八場出賽嘅「極奇妙」就爆冷跑咗個第一，幫大輝贏到一百七十萬元獎金，結果大輝同媽媽、老婆一齊開開心心拉頭馬。
「極奇妙」今年元旦先奪冠，家吓又勝出，大輝梗係開心啦，可惜球場冇咁好景，壞消息冇耐就殺到嘞！