霍家長孫霍啟剛同「跳水公主」郭晶晶戀聞傳完後，近排又一直傳佢哋就快拉埋。不過，霍家上下對呢啲查詢都係三緘其口，尋日啟剛嘅細佬、身兼香港小型足球總會會長嘅霍家二公子霍啟山，出席一個世界盃活動開球禮時，又被追問阿哥嘅婚期，佢都係唔肯講，但就漏口風話媽咪朱玲玲同晶晶感情要好，呢對未來新抱同未來奶奶感情咁好，啟剛真係安樂晒啦。
世界盃下月揭幕，啟山被問及會否聯同啟剛及「未來阿嫂」郭晶晶一齊去南非睇世界盃賽事，佢就好醒目咁話：「阿哥都好少睇波嘅！」
咁啟剛同晶晶嘅戀愛係咪就快開花結果呢？啟山就答話：「傳咗好耐啦！到時大家就知啦！」咁朱玲玲係咪對啟剛婚事好心急呢？啟山就話：「唔係心急，大家感情好啫！」佢嘅意思係，朱玲玲同晶晶感情好，所以咪關心呢頭婚事囉。