母校花草樹木攞靈感

何百里話佢細個已有繪畫天分，運動亦有一手，最擅長係掟標槍同擲鐵餅，曾經做過足球隊隊長。不過有一次佢踢波「頂頭槌」，撞落龍門度，即刻頭破血流，爸爸非常痛心自此勸佢專心喺藝術方面發展。何百里笑言：「如果唔係嗰個『頂頭槌』，可能我都唔會咁專注畫畫！」

佢仲話，九華當年嘅藝術學會好鬼正經，唔多啱佢，所以佢喺母校最有趣同最難忘嘅回憶都唔關藝術事，尋日佢撞番啲校友，好多都淨係記得佢係運動健將。

不過佢就大讚母校嘅校園勝在夠大，周圍都種晒花草樹木，令佢讀書時有好多機會去了解同觀察大自然，從中得到唔少藝術靈感。