尋日多個勞工團體先後發起大遊行，不約而同打出三十三蚊嘅口號，本地最大兩個工會工聯會同職工盟罕見咁同一陣線，向資方嘅二十蚊、二十四蚊宣戰。職工盟日前已高調喺酒會上狙擊政府官員，以出位手法爭取三十三蚊最低工資，工聯會嘅立場都好硬。

條文冇銀碼 魔鬼在細節中

田少日前拆解最低工資嘅僵局嗰陣已經話：「工聯會嘅三十三蚊同張宇人嘅二十蚊都係不切實際嘅！」佢嘅講法亦係唔少商界甚至小企業主嘅心聲。其實，政圈中人都知道，最低工資嘅討論目前正處於要價水平，二十蚊同三十三蚊已經形成兩個極端，雙方嘅目的都係要減低彼此尋求共識嘅讓步空間，所以呢兩個銀碼都唔會係最後方案，田少只係提早將佢哋趕出場啫。

最搞笑嘅係張建宗，佢尋日回應遊行時話最低工資立法係勢在必行，希望立法會七月休會前可以通過主體法例，並喺明年上半年落實。呢個時間表好似好樂觀，但魔鬼又一次在細節中。因為張建宗話，工資率稍後先會建議畀政府，換言之，立法會通過主體法例時，應該只係一個立法嘅條文，唔會有最低工資嘅水平，到底呢個水平係二十定係三十，甚至三十三，仲要慢慢討論，傾好咗先填落法例度，所以勞資雙方拗到火紅火綠，政府都話之你。