小白觀點：「唔好再畀中國人丟架」

世博喺千呼萬喚下終於揭幕啦，不過開幕式仲衰過春晚，但講到最精彩嘅，就係開園嗰一刻，據講有二十幾萬人逼爆園區，諗住湧去睇中國館，亂到九彩。其中有警察搞唔掂，竟然大叫「唔好再畀中國人丟架」，哈，佢以為咁樣就可以嚇窒我國一不怕死、二不怕苦嘅勞動人民，真係天真無邪呀，結果呢位警察哥哥阻頭阻勢，當場畀人箍頸打鑊甘。

所以話呢，其實使乜要起個「中國館」吖，成個世博園區根本就係一個中國館，在在反映出中國人嘅尚武精神。經過幾日試運行，展館搞到爛溶溶，最令人唔明嘅係，明明唔畀帶錘仔刀具入去，因乜事連大理石地磚都爛埋？唔通有少林大師等到把火跺晒腳，又或者有個練鐵頭功嘅絕世高人PK？

我勸維持秩序嘅警察叔叔唔好咁多事嘞，否則下次撞正高手時，為刁民而殉世博，你話幾唔值呢。

Email：sunsiupak@gmail.com

Blog：http://sunsiupak.blogspot.com

阿豪觀點：山寨文化唔怕老外

世博尋日開幕，呢場為時半年嘅大龍鳳會唔會成功，依家言之尚早，但一開波就有單好笑嘢。話說江蘇一個貧困縣斥資上千萬，打造咗一個山寨版中國館，但係有人話中國館本身都係山寨人哋日本嘢，咁如果要告侵權嘅話，應該係世博主辦單位提出吖，抑或係日本方面提出呢可？

講真，山寨文化真係好嘢。記得聽過一個古仔，話說某香港漫畫名宿，幾十年前同行家霎氣，結果畀人惡意報復，佢本公仔書一推出，即刻走去翻版（嗰陣時版權法例始終冇執行得咁好），結果市面有六、七本同名書，到最後呢位名宿索性把心一橫，一段時間內都唔畫新作，索性抄其他行家嘅書，自己翻埋一份……

呢個故事教訓大家，冇創作起碼有一個好處，就係唔使怕畀人抄襲。淨係睇吓尋日上海嘅盛況，中國人民咁萬眾一心共襄盛舉，連垃圾桶都推冧晒，淨係呢種精神，唔通老外可以「山寨」得嚟咩？

Email：lukchiho75@hotmail.com

Blog：http://lukchiho.blogspot.com

網友觀點……

狒狒：世博嘅山寨版製作可能仲有唔少，等你來找尋。

海寶：上海世博肯定會成功，單係弘揚山寨文化就攞滿分啦！

上海仔：世博唔好着睡衣出街呀，可能會被拉去精神病院。

C9：世博亂一早知啦，中國人係咁o架啦，見怪不怪。