滙豐銀行喺尖東嘅一部自動櫃員機，懷疑畀不法之徒喺插卡槽加裝小型讀卡器，仲「配」埋偷睇客戶密碼嘅針孔鏡頭，過百名客戶受影響，其中至少十人確認中咗招，合共損失約廿八萬，警方已經介入調查。

曾令港人攞錢提心吊膽嘅櫃機黨又蒲頭，呢次唔止手法「專業」，同一部機已經掠咗咁多人，都咪話唔得人驚。市民更擔心嘅係，歹徒有冇喺其他櫃員機做手腳？銀行同監管當局又有冇足夠防範措施保障存戶嘅真金白銀？

滙豐尋日承諾全數賠償受影響客戶，全面檢討保安，並且會陸續為櫃員機安裝鍵盤保護罩。

冇錯，呢次「失竊」事件銀行固然要負上責任，保安漏洞更要立即堵塞。不過，就算櫃員機裝晒保護罩，如果金管局呢個「金鐘罩」監管失職，歹徒下次必然會食過翻尋味，照樣得米。

嗱，查實銀行上禮拜五已經將事件通報金管局，但局方居然冇第一時間通知客戶，而係拖到禮拜二晚至公布。簡直官僚到冇朋友，咁嘅「監管」你話係咪有等於冇呀？

叮！拖咗四日乜都唔做，請問優薪厚祿嘅金管局人員，唔通放假「大過天」，存戶利益企埋一邊？周末幾乎個個出街Happy，冇錢就撳機攞，尖東係至旺蒲點之一，嗰度嘅櫃員機畀不法之徒設陷阱，受影響人數不知凡幾。

有立法會議員批評話，金管局應第一時間公布事件，一方面可阻嚇匪徒「收手」，另一方面亦提醒公眾及時採取措施保護自己財產。乜都唔做，等於畀歹徒繼續施施然作案，令無辜市民繼續矇查查中招，金管局咁搞法，同做幫兇替犯罪分子「睇水」有乜分別？

唉，金管局對存戶利益不聞不問已經唔係第一次喇，記得有銀行早排程式出錯導致銀通卡連環失效嘅事件嗎？受影響嘅銀行提款卡多達三萬五千張，而且仲涉及有客戶喺唔知情之下畀人扣咗數。銀行方面出錯後三日通知金管局，金管局一樣冇即時跟進並公布事件。存戶利益一次又一次受損，唔怪得有市民質疑：「銀行保護唔到我！金管局保護唔到我！仲有邊個嚟保護我哋？」

計太一叮話齋，一場金融海嘯，金管局班高官有幾多料，市民睇得一清二楚。雷曼迷債禍及全球，點解喺香港最好賣？櫃員機畀人做手腳全世界都有，點解香港歹徒犯罪手法花樣特別多？唔知呢啲算係本港金融服務業嘅「優勢」，定係金管局嘅「功績」呢？叮！