立法會「五散人」雖然無門無派，但喺約兩年嘅合作後，佢哋嘅隊際表現都愈嚟愈成熟。尋日立法會舉行大會，五散人中嘅會計界議員陳茂波同資訊科技界議員「IT豪」譚偉豪都有提質詢，唔知係咪問題太專業定範疇太窄，議員跟進未算好踴躍，但其他三散人就先後加入戰團幫拖，齊齊幫手狙擊官員，佢哋互相支援，好似政黨運作咁，打頭陣嘅陳茂波同IT豪見到咁多支援，表現更生猛，火力都強啲啦！
陳茂波同IT豪嘅質詢係關於規管非本地註冊上市公司同緩和學生與學校之間矛盾嘅口頭質詢，其他三散人幫手積極發問跟進，當中以保險界嘅陳健波表現得最落力，兩個質詢都有發言，仲啄住答覆官員答漏嘅問題逐點追。
據講，佢哋嘅支援模式係一早諗定嘅，負責提質詢嘅散人事前要預備文件，同埋提供可跟進重點畀其他散人，等後援者易啲跟進，又可以大包圍逼班官答得全面啲。陳健波話，五散人早有共識想加強合作，嚟緊就計劃提出聯合動議，關注中產家庭同中小企所面對嘅問題。雖然合作密切咗，但佢都話，五散人喺投票意向方面仍會保留「各自為政」，亦冇計劃組黨。