本文重點
本港舊年舉辦東亞運動會，論歷史，東亞運動會比起亞洲區另一盛事南亞運動會短好多，因為同樣喺舊年舉行嘅南亞運動會已經係第二十五屆，搞手係老撾。日前，老撾奧委會主席Dr. Phoutong Seng-Akhom率隊訪京後來港，獲港協暨奧委會主席霍震霆邀請共進午餐，老撾方面專登送咗座大大嘅金盃畀霍公子作紀念。
訪京後順道探望
老撾體育界來訪，係因為中國喺比賽前全力支持老撾興建比賽場館，所以Seng-Akhom上禮拜到北京拜訪國家體育總局局長、中國奧委會主席劉鵬，答謝中國嘅支持，跟住順道來港探望霍公子，而霍公子就請佢去香港會所食飯，來賓送咗座金盃作留念，佢哋一個交盃、一個接盃嘅架勢，好有體育場上頒獎嘅影子。
呢類金盃式紀念品，霍公子年中真係收唔少，到底佢會擺喺屋企吖，定係點處理呢？霍公子笑笑口話：「咪放喺銅鑼灣奧運大樓囉！」又係喎，嗰度係本港體育界嘅重地，擺放呢類紀念品真係最適合。