傷筋動骨大件事，行政會議召集人梁振英（CY）滑雪受傷後，月前做咗修復左腳膝蓋十字韌帶嘅手術，出入都見佢篤住拐杖，原本以為佢呢個Look會維持一排，點知前晚CY出席一個慈善基金會就職禮時，已唔見佢再撐拐杖，唔知係腳患好番，定係忍痛唔想畀人「老餅」嘅感覺呢？
CY話，做咗手術後，篤拐杖行路會舒服啲，但係就會不知不覺間依賴拐杖，所以佢寧願唔用拐杖，出街行慢啲嚟適應。不過，始終膝部受傷，佢放棄拐杖後，行起路嚟都有啲唔方便，尤其係上落樓梯時，仍然顯得幾吃力，要扶住扶手慢慢移動。
過去膝蓋十字韌帶手術後復原好慢，但CY話家吓手術以微創方式進行，傷口細，手術後第三日已唔覺痛。依家佢定期做物理治療，又聽醫生指示，每日喺屋企做肌肉鍛煉，傷勢已康復得七七八八。