張文係中學教師，對付頑劣學生梗係有兩手，尋日佢見林公公兜嚟兜去，就係唔肯回應功能界別係咪過渡性安排，就揸住政府九九年向聯合國提交嘅報告文本，特別背咗「功能組別只是過渡安排……」嗰段，然後要林公公跟住佢朗讀一次，咁樣，林公公咪講咗呢句話囉。佢仲話，如果林局長唔肯，就代表政府轉軚，林公公就要將上述句子抄一百次作懲罰。

逞口舌之利想搞掂政改？

林公公接招時，都搬出課堂嘅招數，好客氣咁話：「我知道張文光係老師，教出好多好學生，我讀書時都係好學生﹗」不過，佢既冇跟張文嘅要求朗讀一次，更唔會接佢呢份「罰抄功課」，仲反而要張文跟佢背誦一段○七年特首向人大常委會提交嘅《政制發展綠皮書》第五段嘅內容。兩人將嚴肅嘅政改問題化為課堂無聊對答，搞到在場議員哭笑不得，睇怕下一次，張文要出到掟粉擦、打手板呢啲曾經風行校園嘅狠招至得嘞。

佢哋將議事廳當課室之後，泛民議員出盡百寶都係奈林公公唔何，冇辦法惟有鳴金收兵。林公公近期喺立法會嘅態度真係愈嚟愈寸，上個禮拜已經醒過公文袋嘅余若薇，糾正佢乜嘢係白卷、乜嘢係白紙黑字，尋日又寸教師年資同佢入政府年資有得揮嘅張文，林公公唔通以為逞口舌之利就可以搞掂政改？