小白觀點：免訪民心靈受創
上海當局為營造世博河蟹表象，加大力度監控上訪者，據講有大批訪民被捉咗入拘留所，有啲仲送咗去勞教，真係有租界年代「華人與狗不准內進」嘅feel。其實我好支持當局咁嘅做法，都係為咗訪民好啫。
你知啦，上海人好勢利眼，呢嗱，近排有個富二代物體不知好歹喺網上貼相，相中見到有二十幾份房產證放咗喺地，佢就攤喺隔籬，成個《流星花園》入面個道明寺咁嘅look；咁都不特止，仲要加多句「無力置業者為loser」。所以呢，為免訪民心理受創，等佢哋遠離富二代都係一件好事。
不過話時話，訪民已經係中國嘅著名人文景觀之一，外國旅客嚟世博見唔到呢啲咁難得一見嘅種群，實在有啲遺憾。計我話，一於搵班靚靚禮儀小姐扮啦，佢哋最醜嗰件都掃低電視台啲姐仔，等老外驚嘆中國訪民原來咁索，一定可以樹立國家形象。
Email：sunsiupak@gmail.com
Blog：http://sunsiupak.blogspot.com
阿豪觀點：嬲過入外國租界
上海世博開幕在即，當局如臨大敵，為咗營造和諧氣氛，當局採取非常措施監控訪民同異見人士，並下發通知書禁止佢哋到世博園區以及境外媒體辦公室等地點上訪。
今次事件令人聯想起昔日「華人與狗不得內進」嘅恥辱，但係諗深一層，以前喺租界，管你嘅係外國人，使鬼畀面你咩，但家陣自己人都互相睇唔起，你話係咪倍加激氣嘞？
其實呢個禁令都幾崩口人忌崩口碗，世博會場又唔係信訪辦，境外媒體辦公室更加唔係法院，點解會吸引咁多訪民先？講到尾，咪就係因為正常嘅上訪制度根本形同虛設囉。
曾經有人比喻過，喺中國追求公正就好似追求女人咁，「搞大」咗先叫做搞掂。試問一個循正常途徑上訪，然後直接入住精神病院嘅「病人」，點有能力「搞大佢」呢？
Email：lukchiho75@hotmail.com
Blog：http://lukchiho.blogspot.com
網友觀點……
狗仔：可能當局認為班訪民係有精神病，會危害到外國元首嘅安全。
陳真：內地網民都可用翻牆嚟突破封鎖吖，但訪民就冇符嘞。
福頭：將訪民放置喺香港館就唔驚亂啦，香港應付慣示威嘛！
賓仔：當局想打造一個有中國特色冇抗議示威嘅國際盛會。