點知風雲突變，原先應承參與嘅出版商會忽然轉軚，搞到當局冇晒符。出版商咁做一啲都唔奇，事關將教材分拆出去，出版商一定賺少好多，佢哋梗係唔想啦。奇怪嘅係，政府居然一啲對策都冇，淨係話會同書商保持溝通，睇嚟個計劃分分鐘會胎死腹中。

講起嚟真係冇人信，本港教科書出版不嬲都無王管，出版商大晒，佢哋只要氹得掂學校校長，就可以豬籠入水，根本唔使睇政府臉色。而使用教科書嘅學生同埋家長就任劏，乜嘢發言權都冇。叮！

嗱，一本教科書用咗一年，本來仲好新淨，可以留番畀細佬妹用。家長仲可以去書攤買舊課本，慳番唔少錢。但係你估出版商係傻嘅咩，佢哋年年改版，改幾條練習題，或者換幾張插圖，又或者乜都唔改，淨係將書嘅內容調上調落，就當新版書賣。唔單止唔會降價，仲大幅加價添，吹咩！

政府眼白白睇住啲出版商玩嘢，乜都唔願做。嗰啲官員成日都話，香港係自由市場經濟，出版商定書價係商業行為，政府唔可以干預咁話。大佬呀，教科書關乎幾十萬學生嘅學業，亦影響萬千家庭嘅生活，政府點可以唔監唔管呀。叮！

可能因為畀家長炳得多，當局終於推出幾招，想降低教科書價格。例如，建議三年內唔准教科書改版，但係講咗咁耐都係得個噏字。另一招係推行電子課本，開頭係威係勢，成立咗以教育局副局長陳維安為首嘅小組專責推動，點知搞嚟搞去又係紙上談兵。今次分拆教材，已經乜都傾掂晒，連時間表都定埋嘞，但係出版商一聲唔玩，成件事就渦晒。你話呢個政府有乜用吖？

咁就大鑊嘞，家陣各學校啱啱喺度擬定書單，定好嘅書單又要推倒重來。更弊嘅係，出版商會話就話應承呼籲會員凍結書價，但邊信得過呀。到時會員唔聽佢支笛，一於加價，政府咪又係冇符！唔怪之得有教育界人士直斥政府太過依賴書商出教材，乜都做唔到啦。

一句講到尾，政府根本就唔想得罪出版商，佢哋只係因為畀市民鬧得多，做吓騷應吓景啫，講唔埋仲係同出版商扯貓尾添。最慘嘅係學生家長，又要繼續捱貴價課本嘞。

叮佢個鎯鎯，一個自稱強政勵治嘅政府，居然畀幾個出版商玩到氹氹轉，仲累埋市民使冤枉錢，離唔離譜啲呀？