28/04/2010

播放本新聞相關短片

政情:龔家總動員撐The Lily

華懋集團尋日舉行旗下淺水灣道物業嘅命名及出租記者會,龔家幾乎總動員,除已故王龔如心嘅兩名胞妹龔中心同龔因心外,現任華懋集團主席龔仁心夫婦亦有現身,但龔仁心夫婦因趕住開會而早走。龔中心尋日則首次以集團董事身份主持儀式。

龔中心以「漫長的十年,裏裏外外、深深的懷念」作記者會開場白,向逾百名嚟自本港、京、滬、廣東同海外嘅傳媒介紹The Lily背景,佢話:「王太(龔如心)當年因愛香港,抱住志在必得嘅心態,喺九七年回歸後首個政府賣地場合,以天價55.5億元,投得淺水灣道129號地皮,其後更親自到英國找國際著名建築大師福斯特(Norman Foster)設計物業。」佢直言,呢個淺水灣道豪宅項目係胞姊王龔如心生前最記掛嘅事情之一。

龔中心之後又話:「龔如心鍾愛淺水灣,係有一段鮮為人知嘅故事,喺一九五五年九月二十九號,當年年僅十九歲嘅胞姊下嫁王德輝,結婚後翌日正正係中秋佳節,夫婦二人喺淺水灣沙灘度過婚後生活嘅第一個中秋節。」

佢重申集團上下,以及參與項目嘅人,都希望將物業打造成淺水灣嘅新地標,以完成胞姊嘅遺願。