立法會討論政改方案嘅小組委員會，尋日下晝開會選舉正、副主席，早前我哋已經講過，建制派急急動員黨友參加呢個小組，結果建制派嗰二十三人多過泛民嗰八個人唔止兩倍，選舉當然變咗建制派嘅遊戲，建仔主席譚耀宗獲十三張支持票當選小組主席，副主席就由經濟動力嘅林健鋒（Jeffrey）當選，但得票只得十張，只以兩票嘅輕微優勢贏咗泛民嘅白鴿黨劉慧卿，險象環生。
今次係咪立法會又鬧「鬼」？尋日有份投票嘅建制派有十三人，建仔六個，仲有經濟動力Jeffrey同梁君彥，加上工聯會王國興、謝偉俊、葉劉淑儀同專業會議嘅何鍾泰同劉秀成。泛民就有五個，卿姐等白鴿黨三人加公文袋兩個。
選主席時，譚Sir以十三票對五票撼低卿姐；選副主席時，卿姐再度出戰，明撼Jeffrey，結果得票係十比八，即卿姐突然多咗三票，簡單講即係有三名建制派倒戈投畀卿姐。據講葉劉、何鍾泰同劉秀成嫌疑較大，原因係有人認為應該建制派同泛民均分；另一個原因係上個禮拜預算案表決辯論時，Jeffrey曾經同人「霎氣」。