Kenneth回應時話，爸爸嘅政治生涯唔應該影響個仔嘅學習。十幾年前佢幫大仔揀學校嗰陣，教改先啱啱開始，當時社會上仲有好多爭議，亦有唔少人質疑係咪真係可以做到「求學不是求分數」，而佢確實好認同國際學校嘅教學方針，學生自由啲，少啲背書、多啲創意，所以送個仔去國際學校讀書。兩年前佢轉工入政府，冇理由個仔都要跟住轉學校㗎？

佢跟住又好圓滑咁話，教改發展至今，本港學校已經趨向國際學校模式，即教學方法講創意、多思考，圓滿解決咗學生嘅質疑。之後啲學生又問政府未幫手搞掂樹仁課室同宿舍唔夠嘅事，另一方面又話要整多幾間私立大學出嚟，擔心搞到大學生氾濫。Kenneth話，支持開新校唔等於懶理現有院校，仲叫同學放心，政府會繼續同區議會商討樹仁擴建嘅事。