28/04/2010

播放本新聞相關短片

政情:鄧國斌自比公司醫生

審計帳目從來都係政圈唔討好嘅工作,審計署署長鄧國斌早前發表咗最新一期衡工量值式報告,狠批香港中樂團等多個機構浪費同工時有問題。審計署每年都四圍點火頭,從政府部門到公營機構都大力插,怕唔怕得罪咁多機構,去到邊都唔受歡迎呢?鄧國斌好瀟灑咁話唔會嘅,仲話自己嘅角色好似「公司醫生」咁,審核工作反令機構同文化都健康啲。

特許公認會計師公會(ACCA)香港分會前晚搞咗個六十周年酒會,本身唔係會計師嘅鄧國斌都有現身。審計署以衡工量值嘅手法查核機構嘅工作,好似攞住放大鏡驗屍咁,過去都引起唔少機構反彈,但鄧國斌話,佢哋嘅角色好似公司醫生咁,專幫啲公司部門照肺,睇到佢哋有問題,就畀啲建議佢哋改善,絕對唔係外界講到咁得人驚。

佢仲透露,好似今次佢哋提出中樂團嘅管理問題後,本港其他樂團都好關注,專登索閱報告,研究吓審計署嘅衡工量值係啲乜,避免自己個部門都出問題,所以鄧國斌好高興審計署嘅工作引起其他機構重視,並且自我完善。