青海玉樹縣發生七點一級大地震後，本港搞咗個大規模捐款賑災活動。前晚，演藝界人士發起「演藝界情繫玉樹關愛行動大匯演」，本港及兩岸歌星藝人接力大匯演，署理緊特首工作嘅唐唐都有到場，並以壓軸姿態代表政府致辭，不過佢又再亂噏嘢，仲話本港經歷咗好多天災人禍，真係大吉利是過佢！
唐唐尋日致辭時，話政府已經率先捐咗一億元畀青海省政府賑災，又呼籲市民發揮香港精神，踴躍捐輸，幫助當地災民度過困境。呢啲咁大路嘅發言，照計唔會有乜問題，但唐唐就慷慨激昂到噏錯嘢，話：「其實血濃於水嘅精神，我哋喺香港、喺經歷咗咁多天災人禍……」，講到呢度，佢忽然醒起「人禍」即係自己插自己，所以即刻執生：「……天災之下，我哋係充分發揮血濃於水嘅精神。」
回歸以嚟，政府高官管治失當搞出好多禍事，但從來唔認有「人禍」，今次唐唐衰大口，到底係自打嘴巴，定係自我反省？真係想問吓佢。