卓能主席趙世曾嘅囡囡趙式芝（Gigi），早前投資咗百萬元取得A.D.M.J代理權，佢日前現身馬場，身穿The Swank白色麻紗外套，手挽自己代理嘅日本A.D.M.J手袋，一身打扮春意盎然，仲自己做品牌代言人，一舉兩得。
Gigi當日挽住個玲瓏別致、售價五千八百八十蚊嘅銀色手袋，上邊有A.D.M.J嘅招牌設計「LOVE」字樣，清瘦嘅Gigi挽住更加顯出青春率性嘅一面，再襯埋純白色嘅連身裙同外套，令佢渾身散發春天氣息。
A.D.M.J係由日本設計師小林明彥創立，每一樣用料都係佢親自揀選，袋上嘅珠片同刺繡就由日本技師一針一線手工縫製，係百分百日本手工打造，甚受亞洲名媛歡迎，日本明星藤原紀香、台灣身價最高女歌手蔡依林等，都係呢個品牌嘅擁躉。