本文重點
五月話咁快就到，特區政府雖然揼咗一億五千萬出嚟搞補選，但係政府上下都流露出一副不情不願、不得不做嘅態度，高官圈子私下更加懶懶閒。尋日行會舉行會議，事後問到幾名成員嘅行蹤，先知道5．16離港嘅人都唔少，先有身兼港交所主席嘅夏佳理去菲律賓，然後查史美倫要飛北京，經常出埠嘅楊敏德又話唔知到時喺唔喺香港，加埋其他成員冷處理，行會成員嘅5．16策略似乎係各有各飛，用腳避投票噃！
5．16補選日子臨近， 建制派杯葛手法相繼曝光，大致上都係一個字—「撇」，有啲去澳門，有啲去睇世博，有啲就話去母親節旅行團，總之就係空群離港，當補選冇到。我哋都專登問吓行會成員嘅計劃，查太斬釘截鐵咁話，下個月十六號要出席一個喺北京舉行嘅活動，唔喺香港，唔能夠投票。
另一個行會成員夏佳理早前已經事先張揚要去菲律賓，尋日佢再一次確認5．16當日要飛去菲律賓為親家賀壽，即係話佢都唔喺香港，又點投票呢？
劉遵義上車鬆人迴避
佢哋兩個飛離香港之外，另外兩名成員都分分鐘出埠。擁有龐大生意嘅女強人楊敏德話，佢成日要出門，暫時未確定下個月十六號嘅行程，亦唔知會唔會離港。講完之後，佢好似醒起當日係投票日，所以當大家問佢當日如果留港，會唔會去投票時，佢就笑而不語。
就快離開中文大學嘅劉遵義尋日都話，暫時唔知5．16喺唔喺香港，但佢一聽到「補選」兩個字，就即刻加快腳步上車鬆人。劉遵義係全國政協委員，既然中央早已表示五區「公投」違反《基本法》，佢會點做應該唔難估。啲行會成員一個接一個飛走，唔飛嘅又冷冰冰，五區補選真係凍過水囉。