小白觀點:學生人權意識高漲
女教師上上吓堂失驚無神走咗出去跳樓自殺,以後老師教要珍惜生命,都唔知信唔信好。我發覺香港教師嘅精神狀況唔係好妥,冇辦法,以前做呢行勉強都算係鐵飯碗,但時勢唔同喇,依家郁啲就話縮班殺校,仲搞埋啲基準試令到教師露晒餡肥晒佬,真係師嚴何在呀!自我形象當然低落啦。
記得小白老弟讀書嗰一代,做教師確係開心好多,佢哋放學極少雞咁腳走去塞爆教協門口掃平貨,每日最大嘅樂趣,一係磨爛蓆同學生攬住一齊留堂,一係就上堂發白日夢揀「刑具」,到底應該用大木條好吖,抑或係用膠間尺好呢?諗到幾乎「咭」一聲笑出嚟。不過近年學生人權意識高漲,鬧吓都有罪……唔緊要,我喺網上見到有個內地教師,起飛腳用電光毒龍鑽踢個學生,之後同校長講聲sorry,依然可以繼續做人之患。香港教師大可以北上發展,一定能夠尋回教育工作嘅滿足感!
Blog:http://sunsiupak.blogspot.com
阿豪觀點:為人父母亦壓力大
紅衣女教師返返吓學突然跳樓自殺,真係令人遺憾。為人師表,點解都咁睇唔開呢?又點教學生要有抗逆力呀?
好奇怪,每次有自殺新聞,例必有人走出嚟高調指摘,強調呢個世界上有咩嘢解決唔到呢?呢班發出警世恒言嘅大善人當中,往往就包括教育團體。
聽吓今次佢哋點講,有人話喎,教師壓力大過普通打工仔兩、三倍喎。先唔講佢點計出呢個結論,工作壓力大,唔係應該參加多啲文娛康樂活動宣洩嘅咩?仲有呀,佢哋要求當局即刻檢討官校教師壓力問題喎……有時真係唔明,從事其他行業嘅人自殺,點解冇工會走出嚟爭取權益嘅呢?
最近有大學進行研究,發現近年父母帶仔女一齊自殺嘅個案有增加之勢,咁講法,係咪好應該計算吓父母比未婚或者冇仔女嘅人壓力大幾多倍?政府又係咪應該發放津貼,紓緩一下佢哋嘅壓力?
Blog:http://lukchiho.blogspot.com
網友觀點
春駱駝祥:依家嘅教師心靈特別脆弱,校內社工都要幫吓手至得喇。
阿 水:末代會考生話被迫害都咁堅強,老師點解咁睇唔開呢?
嫌命長:班後生自我形象已經低落,老師仲立壞榜樣。
中二生:學校有幾大啫,睇見咁恐怖嘅跳樓場面,點敢返學呀!