之不過，睇完成份報告，佢就好難再開心喇。社科院提醒香港不進則退，仲話香港嘅經濟規模同高科技產業都已經被上海同北京趕上。加上深圳唔再依靠香港向國際推銷產品，前店後廠嘅模式已不可行，香港嘅優勢已不斷收窄。叮！

其實，自從中央批准上海打造國際金融中心同埋國際航運中心之後，上海發展就一日千里，再加上世界博覽會帶動城市發展，增長速度點會唔快過香港多多聲吖，上海趕上香港係遲早嘅事。

講到發展高科技，最緊要係人才，人哋北京人才濟濟，高科技公司成行成市，高科技產品層出不窮，但睇番香港就眼冤咯，前香港科技大學校長朱經武早就狂炳政府冇培養人才，仲話新加坡地方咁細，科技研究生都比香港多三四倍，可惜政府根本冇耳裝。仲有呀，立法會資訊科技界議員譚偉豪踢爆，政府一直冇制訂發展高科技長遠計劃，咁點發展呀？唔畀北京超過至奇。

講到粵港合作更閉翳，社科院報告直情話，深圳已經具備獨立向國際市場推廣產品嘅能力，往日嘅「前店後廠」傳統合作模式已經唔可行。實際上，自從中國入咗世貿，加上兩岸大三通，廣東早就唔使靠香港做窗口，不過因為中央一日到黑都要廣東做香港嘅後盾，廣東先至做番啲門面工夫畀中央睇吓。難為煲呔曾仲以為人哋冇咗佢唔得，真不知所謂。

仲有噃，香港嘅基建又無法同內地接軌，加上特區政府唔重視科技人才，產業升級緩慢，兩地都唔啱Key，叫人哋點同你合作呀？叮！

所以，社科院報告警告香港政府，要重新思考同定位。但係講咁易咩？話時話，香港仲有乜嘢可以拎得出手o架，製造業早就搬晒上內地，服務業又話要北上嘞，要發展高科技咩，又冇人才。連最巴閉嘅金融業亦面對威脅，除咗上海，深圳好快就要開發前海金融服務區，講到明要建成深圳嘅中環，即係同香港打對台。難怪連社科院嘅專家都為香港擔心嘞。

最弊嘅係，皇帝唔急太監急，政府根本冇危機意識，正如有立法會議員話齋，政府一味伸手向阿公攞着數，不思進取，咁搞法，競爭力有乜法子唔插水呀。

叮佢個鎯鎯，煲呔曾唔好再招招積積吹口哨嘞，快快趣趣諗吓計啦！