唔係嘛！呢啲使乜霍公子操心呀？咁又講錯嘞，事關世界盃六月開波，既然唔可能場場都喺當地睇，咁梗係要有3D，起碼有番啲立體嘅現場感喇。

依家3D電視啱啱開始發展，未係好普及，但對發燒友嚟講，如果睇世界盃有立體效果，都可以填補去唔到現場觀賽嘅不足。霍公子都心思思想買部返屋企同兩個囝囝啟剛、啟山一齊睇，事關三仔爺都係足球發燒友，仲預咗到時瞓少幾個鐘漏夜追睇，睇怕為期一個月嘅世界盃期間，三個人肯定會變成熊貓！

之不過霍公子開口就要部六十吋嘅，市面上暫時未有噃！聽講某日本知名牌子要到七月中旬先至推出六十吋3D電視機，售價約五萬元，但咁啱推出時間係世界盃落幕之後，睇嚟佢要飲恨嘞！

世界盃期間，咁啱霍公子要做空中飛人，既要去法國里昂開奧運協調委員會會議，又要去南非開世界足協會議，足足要做成三十幾個鐘空中飛人，咪話唔辛苦。