IQ博士話有次去上海公幹，同事帶佢行百貨公司，佢哋介紹咗呢個牌子嘅衫畀佢，點知一試好啱身，唔需要改，加上質料同設計都唔錯，價錢相當合理，所以佢一次過掃咗五、六套，仲喺中港幾個屋企都擺定一套，方便出門時帶少啲行李。

佢見到出席同一場合嘅福建同鄉盧文端，仲即刻介紹畀老友，原來呢個柒牌都係福建品牌。盧生聽完即刻摸摸身上套西裝，勁搞笑話︰「嘩！你八百蚊都咁靚，我呢套要八千蚊，下次都要跟你買先得。」畀老友讚有眼光，IQ博士亦禮尚往來讚番盧生身材好，高高瘦瘦着乜都好睇，自己就一定要大碼先啱身。