早前政府宣布將會強制立法停車熄匙，隨即激起運輸業界怒火，環境局局長邱騰華可能見風頭火勢，前日《城市論壇》討論停車熄匙就派出環境保護署副署長陳嘉信頂硬上，邱騰華同佢嘅副局長潘潔都潛咗水。
立法會環境事務委員會尋日召開會議，席間見到潘潔同陳嘉信都在座，保險界議員陳健波特意「讚賞」陳嘉信前日出席《城市論壇》為停車熄匙解畫嗰陣表現淡定，但始終停車熄匙咁有爭議性，奉勸陳嘉信要好小心處理呢個議題。
但白鴿黨嘅甘乃威就即場插邱騰華同潘潔兩個喺個論壇上都唔見影，仲話對佢哋兩個好不滿添，因為停車熄匙係一項政策，點解推個公務員出嚟解畫。明明係理虧，但潘潔仲話陳嘉信係負責處理停車熄匙，所以《城市論壇》由佢出席，而邱騰華會喺聽日立法強制停車熄匙首讀同二讀時現身，又話自己之前都有出過嚟解畫，死撐話係一個團隊分工合作。潘潔咁講，擺明係死撐自己同邱騰華冇潛水啫，但事實係問責官員要負嘅政治責任，唔係公務員可以孭喎！