○五年立法會成立小組會討論政改方案，當時建制派同民主派互鬥「疊馬」，前者有三十四個，後者有二十個，當年仲係前綫嘅劉慧卿仲競逐正、副主席，分別輸畀民建聯嘅譚耀宗同富貴黨嘅楊孝華，戰況激烈。事隔五年啫，竟然完全變咗另一個世界，立法會秘書處尋日公布討論二○一二年經修訂後政改方案嘅小組委員會名單，建制派減至二十三人，民主派更加剩得八人，街工梁耀忠、民協馮檢基同職工盟李卓人都冇報名加入，變相棄守呢條戰線。
據聞民主派眼見同建制派鬥疊馬，都係輸梗格局，索性唔玩，自動放棄發聲權利。建制派聞到民主派棄械退戰陣味，亦冇吹雞「冧友」。小組會今日開第一次會議，選舉正、副主席，喺實力懸殊下，呢兩個位幾乎已成建制派囊中物。
政府將政改方案定為最高軍情，政改小組委員會可謂不容有失，主席一位梗要搵壓得陣嘅人嚟做，難怪雖然譚Sir孭咗三個重要委員會喺身，仍然要佢啃埋政改小組。一句講晒，就係建制派蜀中無大將。
據聞經濟動力林健鋒有意競逐副主席，白鴿黨張文光就話據過往經驗，譚Sir做主席絕少請假、遲到，連廁所都好少去，副主席可以主持會議機會唔多，同普通委員冇分別，所以民主派未必會爭。