本來係畀市民發揮想像力嘅自訂車牌計劃，最近似變成政治戰場之勢。繼早前出現含有疑似不雅英文詞彙、諷刺行政會議召集人梁振英嘅「CYUSH0」自訂車牌後，運輸署下月八日舉行嘅新一輪自訂車牌拍賣，再有疑似英文粗口嘅車牌以供拍賣，叫「D0NALDPK」，只要大家將最尾兩個英文字母同前面六個字拆開，就知佢想鬧邊一個。
呢個惡搞「D0NALDPK」車牌係由參選新界東補選嘅「長毛」梁國雄申請推出競投，已獲運輸署批准，成為下月八日二百五十個競投車牌中嘅其中一個，長毛揚言想為小市民「出番啖氣」。早前長毛申請競投「CYUSH0」，最終空手而回，今次呢個「D0NALDPK」，佢話希望以底價五千元投番喎，唔知嗰日煲呔曾會唔會都去競投會湊吓熱鬧呢？其實，長毛早前已申請「D0NALDPK」車牌，當時第六個字嘅「D」同第七個字嘅「P」分開，不獲批准推出；依家變咗「D0NALDPK」終於獲批，大家又睇吓個車牌投到幾多錢！