早前都講過建仔亦號召成班中委喺「5．16」過大海，「望吓山、望吓海，Macau（澳門）旅行」嚟避過投票，原來建仔嘅立法會議員張學明嗰日都安排咗節目，就係同新界社團聯會班弟兄齊齊坐高鐵，似乎都係想避開五區補選呢個「五指山」，唔去投票啫！

煲呔曾送500鄉紳北上

張學明前排先喺立法會率先爆料，話有鄉事中人因為極之不滿公社兩黨嘅五區「公投」，所以拒絕借出場地畀政府喺「5．16」做投票站，結果證明有五十個場地因為種種原因而借唔出，搞到政府要左撲右撲，最後都只係湊夠大約五百二十個票站，始終比○八年立法會選舉少十幾個。

佢尋日同記者講，為慶祝新界社團聯會今年二十五周年會慶，聯會將有連串慶祝活動，頭炮就名為「新起點、新里程」嘅五百人高鐵團。團員包括聯會入面嘅青年界、婦女界、漁農界代表同埋青年領袖，佢哋會喺五月十四日早上，喺元朗搞完啟動禮就出發上廣州，然後由廣州坐高鐵去武漢，沿途仲有內地鐵道部工程師講解，去到當地仲會獲得湖北省政府接待添。

話明呢個高鐵團去三日，即係喺「5．16」補選投票日先返港，雖然佢哋會坐下晝兩點半喺武漢開出嘅高鐵回程，但返到香港時間都唔早啦，趕唔趕得切去投票仲係未知數。最離奇嘅係煲呔曾不嬲都龜縮喺禮賓府，但呢次竟然山長水遠去啟動禮，唔知係咪開心到好似燒炮仗送班鄉里北上，起碼有五百人唔會去投票呢？

聯會理事長溫悅球就話相信坐兩點半班高鐵返港，應該仲有時間去投票，但張學明冇講明返港之後會唔會去投票喎！仲使講咩，大家心照啦！