小白觀點:夾胸自拍點會形象低落

香港基督教女青年會進行咗一個中學少女魅力素質調查，發現女生上網時間愈長，自我形象愈低，呢啲咁嘅調查認真九唔搭八。我識好多港女夠係無時無刻上網，佢哋嘅自我形象唔止唔低，自信心不知幾爆棚。有個久唔久會自拍夾胸相放上網，仲要加多句：「人哋話我八分似松隆子，兩分似凌瀨遙，我就覺得唔似嘞。」你問我似唔似？平心而論，我就覺得佢似陶三姑多啲。

話時話，近排就有個大學導師宅男中招，千錯萬錯，錯在喺前女主播面前炫耀人工點高福利點好，以為細路女會報以艷羨目光加多句：「嘩，好勁呀！」嘿，點知人哋回句「不過是幾萬元而已」，即刻將呢個通識王打殘。所以呢，社工下次食飽飯冇嘢做，不如做個調查，睇吓嗰啲冇吳彥祖咁靚仔，月入少過二十萬嘅港男，自我形象喺咪勁低好過啦。

Blog:http://sunsiupak.blogspot.com

阿豪觀點:睇見Ruby教英文就自卑

有團體發現「90後」少女自我形象只屬一般，尤其係對自己嘅體格、外表同控制情緒穩定嘅自信不足，對體格滿意程度更加係「唔合格」。唔出奇吖，依家啲女仔，永遠唔會覺得自己夠輕，所以有所謂「X（現時體重）減5磅」嘅公式。但有趣嘅係，呢份調查又話女生上網時間愈長，自我形象會愈低，相反閱讀報章愈耐，自我形象則有所提升喎。上網同自我形象有咩關係呀？莫非佢哋上網都係睇Ruby姐教英文，當堂自慚形穢，覺得自己英文只有小學生水平而自卑？

不過，睇報紙愈多，自信心愈高就有啲道理。你知啦，依家有啲報紙，唔係錯別字連篇，就係連國家領導人個名都搞錯，有時真係連小學生都不如，後生女睇到，自信心梗係暴漲啦！

Blog:http://lukchiho.blogspot.com

網友觀點

羊咩蘇：似乎女生食得愈多愈肥，自我形象愈低合理啲喎。

朱大傻：調查有冇問女生上網睇乜先？上網做功課有乜唔妥！

電車男：女生上網時間愈長，容乜易變晒我咁款呀！

狒狒：家境清貧冇得上網嘅學生，自我形象又會點呢？