停車熄匙條例草案禮拜三上立法會首讀，多個的士團體達成共識，當日會發動罷駛同全港的士「響按」十秒抗議。尋日有論壇討論呢個惹火議題，現場十分火爆，但居然見唔到環境局局長邱騰華。原來主辦單位事前已邀請佢出席為草案親自解畫，點知局方上個禮拜五至回覆話邱騰華唔會蒲頭，「原因」係一早就安排咗要去主持植樹活動開幕禮，趕唔切出席討論喎。

正局長唔得閒，OK，咁派副局長出席都得啩？對唔住，副局長潘潔「另有任務」。乜任務？唔話你知。不過咪話兩位局長唔重視，佢哋已經搵咗替身出席喇。邊個咁運滯畀人點中做擋箭牌？原來係環保署一位負責停車熄匙嘅副署長。

叮！主持植樹活動開幕禮要幾多時間呀？如果邱騰華有承擔嘅，有乜可能安排唔到時間出席論壇？家陣問責局長居然變咗卸責局長，納稅人每年用幾百萬請個問責高官返嚟，原來淨係識點指賊賊，搵個政務官去面對公眾做箭靶，自己就明哲保身縮埋一邊，有冇過分啲呀？

尋日論壇現場有運輸業界人士質疑本港天氣炎熱，停車熄匙會影響司機健康，增加經營成本，希望當局唔好「一刀切」推行，並且擴大豁免寬限。但出席論壇嘅環保署副署長就不斷重複政府立場，話為停車熄匙提出豁免寬限，已經參考咗外國經驗，又話如果好似外國咁為執法人員提供酌情權，市民未必接受條例存有灰色地帶。

政務官唔使負政治責任，亦冇義務幫老頂孭鑊，更唔會為咗死撐當局嘅擾民措施而做醜人。副署長全場扮演「人肉錄音機」完全係意料之中。最離譜嘅就係，停車熄匙條例草案過幾日就要上立法會，社會仲存在好大爭議，咁關鍵嘅時候，邱騰華身為問責官員唔企出嚟傾聽民意，唔諗辦法縮窄分歧，而係唔見咗人。

邱騰華玩龜縮早有前科，當日推出相關草案，佢突然急Call記者去政府總部，對住鏡頭係咁意講咗五分鐘就即閃，新提出嘅豁免措施點計時、邊個執法等問題，完全冇答案。

計太一叮話齋，上樑不正下樑歪，曾蔭權搞環保，藍天白雲愈叫愈走，畀人叫「氣候逃犯」；邱騰華推行停車熄匙就搏命卸責玩龜縮，唔通想拍住煲呔曾，做埋「減排逃犯」？叮！