繼舊年推動「師友計劃」，扶持同關懷年輕人後，律師會今年再添食。反應咁好，王桂壎都喜出望外，但佢自嘲年紀大，形象似爸爸多過大哥哥，寧願搵班義務律師幫手。

除咗忙住做義工，佢近日亦忙於趁換屆前交張靚靚成績表，包括爭取改革律師事務所模式，又忙於拜訪將換屆嘅深圳律師會。計劃多多，做唔做得切㗎？畀記者咁問到，佢忽然爆出一句：「可能做多一屆會長，咁啲時間咪鬆動啲囉！」

咁講法即係放聲氣會添食，想做多屆會長啦！聽到佢咁講，可能有啲人想爭嘅都會縮沙。

老公咁忙，老婆梗要爭取時間相聚啦，好似尋日咁，王太就陪老公出席一個公開活動，王太話老公出外公幹，佢都夫唱婦隨，但千祈唔好以為王桂壎出埠時會抽空陪太太行街買嘢喎，事實係當老公做嘢時，做老婆嘅只能自得其樂，等老公辦完事就趕住返香港。簡直係跟得夫人呀！