第二期香港非物質文化遺產普查喺年中展開，預計普查喺二○一二年初完成。康文署邀請新界鄉議局協助提供新界地區有價值嘅項目，為人熟悉嘅有祭祖、點燈、上樑同山歌等，而鄉議局「雙發」，包括主席劉皇發同當然執委黃宏發，就分別建議將山茶同民間賭博方式納入其中。
喺屯門龍鼓灘長大嘅發叔話，以前鄉村村民冇咁矜貴有龍井同普洱飲，由細到大都係飲山茶。山茶係乜？發叔話山茶茶葉同普通茶葉冇乜分別，係一種矮小植物，好粗生，摘下後曬吓太陽，然後炒乾，用嚟沖茶相當好味，加上山上奉旨冇人落農藥，保證冇毒，署方可以研究一下。
同樣被稱呼為「發叔」嘅黃宏發認為民間五花八門嘅賭博方式都好值得記載，好似紙牌、字花、十五胡「釣魚」等。康文署代表話如果村民發掘到有價值嘅項目，但又唔知算唔算係非物質文化遺產，可以交由署方審視同篩選，目的係搵多啲有價值嘅項目喎！