沙田馬場尋日舉行「愛彼錶女皇盃」國際一級賽事，好多城中名人都有入場，馬迷亦費盡心思製作打氣標語為心水馬匹打氣。賽前熱門之一嘅「威利旺旺」馬主莊友堅，喺十幾位老友助陣下準備捧盃；另邊廂，賭王何鴻燊女兒超雄就同賭王四太梁安琪以及孖仔猷亨、猷君同超欣入場。結果賭王嘅「爆冷」以十六倍賠率跑出，何家大細喜出望外，四太更加high爆，高興到同馬會主席陳祖澤攬頭攬頸添！
今次係繼○七年之後，「爆冷」第二次喺「愛彼錶女皇盃」奪冠，計埋尋日捧走嘅八百萬元頭馬獎金，「爆冷」累積贏得嘅獎金已經超過八千萬。四太話賭王原本想入場睇愛駒出賽，但由於對隻馬信心麻麻，所以留喺屋企睇電視直播。知道愛駒跑出後，賭王都讚呢隻八歲愛駒老當益壯添！
被賭王讚過係何家最靚淑女嘅超欣話，今次係佢首次拉頭馬，所以好開心，「爆冷」衝線一刻佢都好肉緊咁幫佢打氣。猷君話長大後如果父母允許，佢都想做馬主，因為始終係做善事。四太就即時喺馬主廂房選購現場展示嘅愛彼錶，最貴嘅要二十幾萬元，但啲款唔係好啱，事關佢想要兩隻運動型嘅男裝錶，唔知係咪要送畀兩個囝囝呢？