26/04/2010

播放本新聞相關短片

政情:鬍鬢曾黐金糠煨番薯

本文重點
財爺鬍鬚曾一向當個人網誌係政治急救箱,以前畀人話「黃皮白心」,就喺網誌上講中國功夫、黃飛鴻,想為其「鬼佬」形象洗底。成日想吸引中南海注意嘅佢,最近做咗港台經濟文化合作協進會(經協會)榮譽主席,以為食住近年兩岸吹暖風大勢,可以得償所願啦,點知中空寶,冇人談論佢,更加冇人記得佢同台灣有乜關係。

被人冷落應該好難頂,所以佢尋日喺個人網誌又賣膏藥,硬銷自己嘅「台灣因緣」。佢一開口就話自從月初成立咗經協會,各方朋友反應熱烈,對經協會嘅未來工作問長問短,真係好有賣花讚花香嘅味道,跟住下面七百幾字,通篇介紹佢同台灣嘅關係,hard sell到痹。

經協會姍姍來遲

佢嘅「台灣因緣」由年輕時嘅美國大學同學,一路講到上年返東莞見台商,呢條「黐金糠」歷程都算長囉。首先係晒人脈,指唔少昔日校友,今日已喺台灣唔同界別各領風騷;然後晒經歷,話做咗政府財金官員,同台灣嘅官員及商界打嘅交道更密;就連鳳梨酥、小籠包、侯孝賢、蔡琴同胡志強都唔放過,話台灣嘅人同事,同樣叫佢回味,希望可以盡快動身去台灣訪問喎。鬍鬚曾噴咁多口水,無非想營造一個同台灣關係深厚嘅外在形象啫。

兩岸三通咗一年半,政府先至姍姍來遲成立經協會,已經落後形勢㗎啦,估唔到鬍鬚曾想粉飾形象,一樣慢過人,經協會成立咗大半個月,先至嚟吹噓自己同台灣嘅「因緣」,港台關係靠佢領軍,有幾高效率,可想而知。

眾所周知,台灣地形似番薯,鬍鬚曾坐得經協會榮譽主席個位,與其咁得閒寫網誌自吹自擂,只顧猛咁同番薯扯關係,不如抽時間學好啲「煲冬瓜」好過啦,佢嘅蹩腳煲冬瓜曾成政壇笑柄,日後率團訪台,若果煲冬瓜喺番薯面前出醜,咁就丟晒香港人架喇!