本文重點
早前講過香港總商會將喺五月三十一號舉行換屆選舉，主席包立賢夠鐘卸任，正、副主席接班團隊大局底定，主席之位由常務副主席「肥胡」胡定旭接棒，周松崗升任常務副主席，「小超人」李澤鉅同中銀香港總裁和廣北連任副主席，剩低嗰個副主席位置據聞已有接班人選，由置地首位華人總裁彭耀佳嚟坐。
選舉當日飛上海
總商會換屆，令人諗起上年富貴黨前主席田北俊喺上屆選舉大意失荊州事件，今年會唔會又捲土重來撐中小企上位呢？問過田少，佢話至今未收到尋求支持爭逐理事會嘅電話，楊國琦亦向佢表明心迹，話上年失落副主席後已感意興闌珊，唔會再競逐，所以今年總商會換屆，田少落得清靜，而且換屆選舉當日佢仲會離開香港添！
咦！田少喺總商會換屆嘅日子離開香港，唔通為咗避戰，或者遠離是非漩渦？田少叫大家唔好咁心多，只係因為旅發局趁上海舉辦世界博覽會，於是六月喺上海推廣香港旅遊月活動，身為旅發局主席嘅佢要喺三十一號飛去上海，出席旅遊月活動開幕式啫。
田少仲話支持彭耀佳做總商會副主席，覺得佢係有能之士，而肥胡本身已經係常務副主席，按傳統接任主席之位，佢亦表示支持。田少講得咁清楚，睇嚟今年總商會換領導層，都冇乜懸念囉，一心等睇熱鬧嘅觀眾，可能會失望嘞。