小白觀點:補習天王外洩試題至真

末代會考生真命苦，聽講今屆題目深到無倫，篇閱讀理解文章仲長到冇朋友，由頭到尾睇一次都差唔多收卷；最激氣嘅係，當局好似驚考生時間多得滯，要邊考試邊貼條碼，好多人考完科中文，已舉手投降。難怪應屆會考生成肚氣，懷疑考評局想攞佢哋較飛，除咗着黑衫考試表達不滿之外，仲喺facebook搞咗個「我相信可能找到十萬人是討厭香港考評局」群組。

話時話，我就唔係好信考評局將試題外洩嘞，頂多就係有人懶出題，求其搵張坊間流傳嘅模擬試題交差就算，所以嚴格嚟講，應該係補習天王外洩試題畀考評局至真。

仲有呀，有時我都覺得班考官幾可憐，監考講句嘢都畀港女寸發音唔正，小白老弟認為佢哋都應該開番個「我相信可能找到十人是討厭香港會考生」群組，要湊夠數相信唔太難。

Blog:http://sunsiupak.blogspot.com

阿豪觀點:流行曲一樣聽唔到唱乜

今屆最後一屆會考，末代會考生前路茫茫已夠慘，點知仲有應考聆聽嘅學生投訴，紅外線耳筒接收唔清。喂，呢個問題好似講咗好多次喇喎，點解仲係冇改善？

不過另一個投訴就有啲無厘頭，有人竟然投訴試卷內容太深，似高考程度喎！吓，咁都得？佢哋嘅理據係，錄音播出嚟嘅速度太快，考生要將答題簿揭嚟揭去遷就錄音內容，更加係史無前例，質疑考評局有心迫害末代會考生，刻意壓低成績，嚟凸顯新推出嘅中學文憑試成功。

冇錯，呢個考評局嘅往績係離晒譜，有九十幾樣衰嘢，不過另一方面，滿口懶音嘅人比比皆是，你去聽吓啲流行曲吖，雖然大家都係廣東人，但係歌手一味喺度咿咿哦哦，你分分鐘唔知佢唱緊乜。如果話今次聆聽試題比以前深咗，就真係要具體事情具體分析嘞，係咪應該畀啲應屆會考生聽聽流行曲比較吓呢？

Blog:http://lukchiho.blogspot.com

網友觀點

駱駝祥：唔識答賴試題深係正常反應，但惡到要抗議就……

多口仔：凡係畀人叫末代嘅都唔慌好嘢，考生怕且要自求多福喇。

田爺：係啦，太深。反正唔識，唔好溫習喇，去考評局示威，或者有分加。

笑爆咀：考生睇咗特首嘅「咖啡的啟示」，可能會少咗不滿，多咗鬥志㗎。