呢幾年本港藥物事故未停過，久唔久就爆鑊杰嘅。無論中藥定西藥、成藥定原料，統統走唔甩。審計署舊年十月批評衞生署對藥房同藥行冇監冇管，巡查不足兼甩甩漏漏。立法會政府帳目委員會下個月將發表報告，據講會對食物及衞生局局長周一嶽表示極度遺憾，對把關不力嘅衞生署署長林秉恩「處以極刑」，以最嚴厲措辭譴責。

帳委會火力咁猛近年少見，又難怪嘅，一次係咁，兩次又係咁，衞生署依然故我，對批評愛理不理，咪話議員，直頭連佛都有火啦。

叮！審計署嘅衡工量值報告話，藥劑業及毒藥管理局十年前已經提議修改藥物監管法例，但當局一直未有立法。有人利用監管漏洞，以轉口為名將未註冊藥物運入本港銷售，居然冇人理。

乜唔係有人巡查嘅咩？一講更加把幾火。審計署發現，有四成批發商同四成七進口商超過一年時間冇畀衞生署查過。成年流流長，居然接近一半業者做乜都冇人理，而且仲係涉及人命關天嘅藥物，有冇離譜啲呀？衞生署分明係攞市民條命仔較飛啫。

叮！仲有更離譜㗎。對註咗冊、攞正牌嘅銷售商，監管已經咁兒戲，署方處理無牌銷售更加放軟晒手腳，收到投訴或者轉介至係咁意做少少嘢，唔係嘅話，郁都懶得郁。

講真，本港藥物監管制度早已經千瘡百孔。就講早排發生嘅「保濟丸回收事件」，唔搞到咁大劑都唔知，原來本港進口中成藥唔使經衞生署化驗，藥廠只要將化驗報告提交畀署方睇吓就搞掂。至於衞生環境同藥材貨源有冇問題，根本就唔會去查。

嗱，早輪保濟丸被驗出含致癌西藥同減肥藥，如果唔係新加坡驗出，香港恐怕懵然不知。點解呢啲中成藥咁容易流入本港市場通街賣？咪就係當局監管不力靠害囉，衞生署難辭其咎。

至弊當局從來都唔認衰。呢，林秉恩回應保濟丸事件嗰陣，高調否認藥廠「無王管」。但事實勝於雄辯，全港三百四十二間「過渡性領牌中成藥製造商」入面，至少一成即係起碼有幾十間「廠址」居然喺住宅大廈，其中三間更設喺居屋。呢啲就係當局所謂嘅「監管」嘞！

衞生署平時唔嗲唔吊，出事就急急卸膊，事過境遷，一切照舊，搞到藥物監管頻頻爆醜聞，發霉藥、過期藥、未註冊藥……五花八門乜都有。嗱，唔使等帳委會出聲，太一叮喺呢度先幫市民出氣，叮佢個鎯鎯！叮！叮！叮！