小白觀點:排場拍得住平機會

審計署報告又發功，今次攞咗香港中樂團出嚟祭旗，踢爆當中有二十名職員嘅實際工作時數比起規定少咗四成，外訪時仲要坐商務客位，排場拍得住平機會呢類政治花瓶。

點知中樂團嘅理事聽完之後嗤之以鼻，反過嚟話審計署用朝九晚五模式嚟計算好唔公平，樂師唔同一般打工仔，除咗常規練習時間，不知用咗幾多私人時間打理樂器呀、練譜呀、記譜呀咁，仲有呀，如果外訪唔坐商務客位，隨時會影響表演水準添㗎。

聽過佢哋嘅解釋，小弟覺得好有道理，所以呢，我都打算打個電話同編輯大人爭取大加稿費，唔好睇小呢幾百字呀，為咗寫呢個欄，我同豪伯晚晚要去酒吧劈酒搵靈感，然後再通宵直落打牌研究題目，用咁多私人時間，如果唔收番最低「字薪」一字千金，肯定會影響寫作水準！E:sunsiupak@gmail.com

Blog:http://sunsiupak.blogspot.com

阿豪觀點:反擊理據值得學習

審計署發表最新報告，批評香港中樂團管理混亂，部分樂師實際工作時數比規定要求少四成。咁都唔止，報告亦話佢哋表演送飛冇監冇管，行政人員出訪時亦會選坐商務客位，住酒店就高於規定嘅規格……咦，乜咁似平機會嘅？

不過睇真啲，其實中樂團仲厲害過平機會。平機會之前畀人鬧爆，表面上都會敷衍兩句，話會跟進改善，然後就意見接受，態度照舊；中樂團就唔同嘞，立即高調反擊，例如話審計署朝九晚五式計算工時方法唔公平，漠視樂師平時投入嘅個人練習時間。根據中樂團方面嘅講法，樂師平時打理樂器、練譜記譜等等都應該計入工作時間。

如果係咁樣就好囉，譬如我哋寫稿佬吖，平日要讀多啲書吸收知識，最好就係去外國叉吓電refresh吓，咁就可以有多啲寫作靈感嘞……吖，唔知可唔可以計入工時呢可？

Blog:http://lukchiho.blogspot.com

網友觀點

吹簫：樂師自己練習都當做嘢，打工仔放工搭車咪可當加班？

鷓鴣：樂團行政人員分明當政府係傻仔，你付鈔，我歎世界。

樂迷：唔知幾時又有飛派呢？想聽吓浪費咁多公帑嘅樂團有乜唔同！

阿MUI：我仲以為HKCO呢幾年搞得好好……唉……失望！