本文重點
最低工資究竟係廿蚊、廿四蚊定三十三蚊？立法會飲食界議員張宇人就因為「廿蚊論」火燒身。對於最低工資呢個咁惹火嘅問題，平等機會委員會主席林煥光前日上完電台講殘疾人士嘅最低工資水平，尋日又上論壇講最低工資，真係唔識死。
「常餐論」難息紛爭
林煥光話自己成日幫襯茶餐廳，都有做過統計，數吓幫襯開嘅茶餐廳有幾多樓面伙記同茶客，自己平時又會消費幾多錢咁。結論係，即使最低工資定喺最高嘅三十三蚊水平，以佢食開嘅常餐價錢，只要加一蚊至個半已彌補番晒啦。況且，過去一年，佢食開嗰份常餐加價加咗都唔止一蚊啦！所以，佢話舉腳贊成最低工資立法，保障基層勞工可以有尊嚴咁生活。
社會上為最低工資拗嚟拗去都未拗掂，係咪林煥光一個「常餐論」就擺得平呢？咪咁天真啦！