話說前日立法會辯論預算案有關修訂時，喺動議人公文袋黨魁余若薇發言後，竟然再冇其他泛民議員接力撐佢，跟住林公公不費吹灰之力，個修訂就遭否決。

跣余若薇一鑊

經濟動力嘅林健鋒之後仲寸寸貢咁話，余若薇可能趕住要送個女返英國，所以咪草草收場囉！佢呢個理由實在太牽強，但白鴿黨嘅異常舉動，反而有人質疑係咪因為早前公社兩黨搞變相「公投」同白鴿黨鬧得不快，所以白鴿黨還以顏色，呢次跣番余若薇一鑊？

究竟搞邊科？原來當日余若薇發言時，白鴿黨負責政制範疇嘅議員如劉慧卿、張文光咁，去咗立法會二樓同終極普選聯盟商討日後搞遊行等活動嘅細節安排，當見到余若薇講嘢就心知不妙，即刻拿拿臨返入議事廳，可惜一切都太遲嘞，林公公已經就修訂答辯，乜都追唔番喇！

雖則個修訂獲通過嘅機會好微，但錯過令林公公難堪同尷尬嘅機會都唔抵啦，咁順攤放生咗林公公，就連白鴿黨都呻笨，自嘲呢次係「忽然河蟹事件」。