尋日係立法會第二日辯論預算案，輪到辯論工聯會王國興提出嘅修訂，建議刪除近一億五千萬元立法會補選經費。杯葛選舉嘅建制派車輪轉發言，專業會議成員梁美芬更先後發言三次，但內容好似星爺教演戲咁「由內到外」，由香港選舉講到台灣議會文化，搞到戰友「大舊石」石禮謙都頂唔順，舉手叫主席提醒議員發言要貼題，唔好講嚟講去都唔到位。
其實好難怪大舊石暗寸自己友，事關梁美芬每次發言講足十五分鐘，首次發言話好多市民討厭所謂「五區公投」，更擔心泛民主派愈玩愈大，玩到變成「十區公投」。實情立法會只有五個選區，何來有十區呢？莫非佢將立法會同十八區區議會搞亂咗？至於第二次發言佢就主力反駁白鴿黨何俊仁嘅言論，第三次發言則大談台灣議會文化，話議員經常打交云云。
除咗呢一筆，梁美芬同專業會議嘅投票意向都各走各路，佢支持修訂，但大舊石、何鍾泰同劉秀成都投反對票。梁美芬同專業會議嘅長遠合作，確實令人擔心。