早前富貴黨副主席張宇人就最低工資時薪發表「廿蚊論」，結果要出嚟道歉，該黨主席Miriam劉健儀仲立即召開記者會同佢劃清界線，事前連打個招呼都冇，之後仲勁插「廿蚊張」冇「說話的藝術」至搞爛檔攤。盛傳廿蚊張覺得Miriam做得太絕情，所以早兩日公布飲食業最低工資調查前，事先唔肯將調查結果知會Miriam，扮神秘嚇吓佢，等佢估估吓，歸根究柢都係心中有氣！
廿蚊張公布飲食界調查結果同富貴黨嘅立場不謀而合，都係贊成將最低工資定喺不高於廿四蚊水平。廿蚊張話開記招前冇將調查結果知會富貴黨，因為覺得根本冇呢個需要喎！何解呢？佢晦氣咁話，既然富貴黨由佢發表「廿蚊論」以嚟，一直都話佢嘅意見唔代表黨立場，咁之後佢發表嘅相關言論，應該都唔會同黨有太大關係喎，所以唔覺得要知會Miriam噃。佢仲話何況Miriam由始至終都冇親口問過佢有關嘅結果，所以由得Miriam睇記招就算。
Miriam咁緊張，原來係擔心廿蚊張再重蹈覆轍。佢自爆喺廿蚊張公布飲食界結果前，特登問過黨嘅職員到底廿蚊張有冇講低調查結果，但職員話廿蚊張唔肯講，佢惟有等記招結果。好彩最後大家立場一致，Miriam都話覺得好開心，起碼唔使再四出解釋。正副主席都要估估吓，將來可以點合作？