陳健波到底指邊啲議員勤力呢？佢尋日話，佢發言前專登對住功能組別議員嘅名單，逐個名咁回憶番佢哋嘅表現，對於勞工界議員李鳳英同航運交通界代表劉健儀就印象最深，覺得佢哋既勤力，喺維護業界利益嘅同時亦識得平衡社會大眾訴求。佢仲話有成二十個功能組別議員都做得好好，點名讚揚三個「團友」，即同係「五散人」嘅資訊科技界譚偉豪、廠商會林大輝同會計界陳茂波，但就獨獨冇提到醫學界嘅「怪醫」梁家騮。

三項「基本功」要做好

身為「五散人」黨鞭嘅陳健波話，知道好多議員其實暗啞底做咗好多嘢，但未必個個有機會發表，先搞到有啲功能組別代表好似冇乜功績咁。不過佢話身為議員，一定要盡可能顧及有良好嘅出席率、投票率同發問率，呢三項「基本功」做得好，起碼少一個機會畀市民詬病先喎！唔通就因為怪醫嘅出席率未達標，先令到黨鞭唔開口讚佢？唔通黨鞭想送隻黑豬畀佢？

一向厚道嘅陳健波冇特別指出邊啲係佢覺得唔達標嘅議員，但話由其他議員對富貴黨副主席張宇人「廿蚊論」嘅反應，就知功能組別議員並唔係完全唔顧社會利益，仲話自從「廿蚊論」一出，無論直選定功能組別嘅議員都鬧爆廿蚊張冇人性，爭住同佢割席，可見佢哋絕對唔係偏幫番功能組別喎！

不過，到底佢哋係為自己定為市民至唾棄廿蚊張，真係問番嗰啲議員心裏面嗰句先知嘞！