不過，政府民望急跌，一啲都唔奇。正所謂群眾嘅眼睛係雪亮嘅，政府正經事唔做，經濟民生一塌糊塗，有乜法子唔怨聲載道呀？

其實，中大早前嘅民調已指出本港貧富懸殊加劇。有數字為證，回歸前，本港窮人不足一百萬人，領綜援個案只有十八萬宗，但係家陣窮人有一百二十幾萬咁多，領綜援個案亦升到二十八萬宗，增加超過五成。

仲有噃，近排樓價猛咁升，中產人士都要望樓興嘆，好多基層市民就住籠屋、板間房。有錢人日入斗金，窮人冇瓦遮頭，不患寡而患不均，一個香港兩個世界，邊度會有和諧喎。叮！

最弊嘅係，政府眼白白睇住貧富懸殊愈嚟愈犀利，但乜嘢都唔做。鬍鬚曾嗰份財政預算案，只推出一啲一次性措施，仲係到喉唔到肺，治標不治本。其實政府唔係冇錢，庫房滿到瀉，但係政府撳住個荷包，一味顧住自肥，公務員竟然逆市加薪。

叮佢個鎯鎯！政府唔為市民紓困不特止，仲要推出擾民措施添煩添亂。其他唔講，就講環保政策，政府吹水唔抹嘴，話要香港重見藍天白雲，但係講咗咁耐淨係得一招，叫做停車熄匙。香港夏天熱到暈，閒閒地都三十幾度，停車熄匙，架車即時變蒸籠，司機乘客等同焗桑拿。舊年諮詢已被鬧到七彩，可惜當局聽唔入耳，做咗啲小修小補，又掟畀立法會討論。正所謂見微知著，淨睇停車熄匙呢項戇居政策，就知道政府不嬲罔顧市民利益啦。咁搞法，民望又點會唔插水噃。叮！

本來呢，民望下跌未必一定係壞事，古人講過「知恥近乎勇」，可惜班高官乜都唔叻，最叻係自欺欺人。嗱，上次中大民調出爐，佢哋就話「言過其實」，仲賴傳媒唱衰佢，家陣港大民調推出，佢哋又裝聾扮啞。

民怨沸騰已係不爭嘅事實，如果煲呔曾仲係採取鴕鳥政策，呢個火山遲早會爆發，到時先至後悔就太遲嘞。叮！