平時開行會，CY定會喺政府總部正門落車，之後就好瀟灑咁行上總部嗰條幾十級嘅樓梯開會，但佢尋日開行會時要篤住支士的趷趷吓，眼見好難上樓梯，惟有改為搭電梯。

外界視CY係疑似特首參選人，雖然行動不便，但無阻佢同傳媒打交道，趁機建立親民嘅形象。例如佢等電梯時好識做咁企定定畀記者任影唔嬲，之後仲有問必答，交代自己嘅腳患康復情況，話隻腳已經好得七七八八，過多兩個禮拜連拐杖都唔使用，相信到時又可以好似以前咁健步如飛喎。

不過，CY一味顧住講自己隻「痛腳」，可能連等緊電梯都唔記得咗，當佢眼尾瞄到電梯門就要關上時，佢情急智生，將手上嘅士的對正電梯門罅一篤，度門即時彈開，佢就隨即閃入電梯去開會。原來士的唔一定用嚟篤地同借力o架，仲有其他用途，CY咪有辦你睇囉！