資深政務官有斷層

劉勵超曾經講過將人生寶貴嘅十年放喺香港嘅地政規劃工作上面。嘩！人生有幾多個十年呀？政府內部又有幾多退休高官喺土地政策浸足十年？外界估計劉勵超理應好快成為發展商嘅頭號獵物，所以佢選擇退而不休，但唔係去食發展商茶禮，反而食政府回頭草，其實好值得官門中人振奮，至少打破地政官員被指「官商勾結」嘅宿命。

其實，以佢對地政規劃嘅爛熟程度，政府搵佢幫手可謂搵啱人選，但從另一個角度睇，亦反映政府內部人才不足，資深政務官有斷層，再過十年八載，可能「媽打」劉李麗娟同余黎青萍等一班舊人全部都要回朝，做晒三司十二局顧問都唔定。